Летните бури можат навистина да ги оштетат електронските уреди, еве како да го спречите тоа

Во последните денови, копнените делови често се зафатени со грмежи и невреме. Самиот гром можеби нема да им наштети на електронските уреди, но ударот со гром може да предизвика сериозна штета.

За да не морате да купувате нови електронски уреди за вашиот дом по едно такво невреме, еве неколку едноставни совети како да избегнете таква штета.

Зошто молњата е закана за електрониката?

Секој електронски уред има максимално напонско оптоварување што може да го издржи. При редовна употреба, напонот во електричните инсталации малку варира. Но, кога имаме невреме со грмотевици или кога гром удира близу до далноводи или директно во нив, наглиот пораст на напонот може да доведе до преоптоварување, оштетување (топење на чувствителна електроника) или дури и до палење на уредот.

Како да ги заштитите вашите електронски уреди?

Пред се, исклучете ги каблите за напојување од штекерите за време на бура. Кога уредот е поврзан со штекерот, тој е исто така поврзан со електричната мрежа. Ако удри гром во електричната мрежа во вашето подрачје, без разлика дали е генератор, трансформатор или столб од далновод, тој удар се пренесува и оди директно до вашите уреди.

Затоа, со цел да го избегнете тоа, исклучете што е можно повеќе уреди, односно вашите кабли од напојувањето. Апаратите за кои е потребен постојан проток на електрична енергија, како што се фрижидери, замрзнувачи или медицински помагала, може да останат вклучени.

Нема никаква гаранција дека гром ќе удри точно во вашата област и ќе предизвика скок на напонот, но секогаш е подобро да преземете мерки на претпазливост и да ги исклучите вашите уреди.

Заштитете ги вашите електронски уреди од самиот удар

Иако речиси сите згради во Македонија имаат некаков вид на громобран, кој во случај на удар на гром треба безбедно да ја спроведе моќната енергија во земјата, секогаш постои опасност гром да удри во самата зграда (наместо во громобранот) или околината и на тој начин да ги погоди каблите или цевките што водат директно кон зградата или куќата. Металните цевки (како што се цевите за вода) и жиците што водат кон зградата се влезните точки и ќе бидат погодени од струен удар кога гром ќе удри директно во нив или во близина.

Колку подлабоко се цевите во земјата, толку помали се шансите електричниот полнеж да ги достигне, затоа што земјата ќе го неутрализира.

Далноводите, телекомуникациските водови и сличната воздушна инфраструктура на столбовите, треба да имаат заземјена заштитна жица поврзана со столбот, со цел да ги насочи молњите во земјата и со тоа да го спречи пренесувањето на ударот по жиците. Ако имате такви кабли што влегуваат во вашиот дом или зградата, консултирајте се со електричар за тоа што можете да направите за да ги заземјите (ако веќе не се заземјени).

Исклучете го интернет кабелот

Поголемите количества електрична енергија минуваат низ каблите за напојување до уредите, молњата може да помине и низ комуникациските кабли. Електричните струи течат низ комуникациските кабли, како што се Cat 5e Ethernet каблите, и испраќаат информации кон сите уреди. Оваа способност за пренос на електрична струја овозможува молњата да се шири низ каблите и да влијае на поврзаните уреди.

На пример, лаптопот што не е поврзан на електричен штекер, но има интернет кабел што го поврзува со штекер за LAN, исто така може да се оштети ако се појави удар на гром. Кога ги исклучувате каблите за напојување од приклучоците, исклучете ги сите мрежни или етернет кабли што се приклучуваат на ѕидови.

Исто така, исклучете ги каблите од вашиот рутер (само означете ги претходно за да знаете како да ги вратите подоцна).

Инсталирајте заштитник од пренапони

Ако живеете на место каде што често има невреме со грмотевици или пак, сакате да бидете сигурни дека вашите уреди ќе бидат заштитени, едниот од начините е да инсталирате заштитник од пренапони.

Тоа може да биде продолжен кабел, опремен со заштита и кој ќе ги заштити сите уреди поврзани со него од ненадејна промена на нивото на напон.

Постои можност и за поставување на пренапонска заштита во форма на заштита на дистрибутивни ормари, електрични инсталации и уреди од ефектите на атмосферските празнења. На овој начин се вградува заштита при самиот влез на струја во станот или куќата и автоматски ги штити уредите во тој дел од пренапон. За таква инсталација, сепак, потребно е да се јавите кај овластен електричар.