Samsung Galaxy Note 10.1 vs Apple iPad 3

Вовед

Oсвен ако не сте биле на одмор добри месец и повеќе, тогаш веројатно сите сте запознаени со судската војна помеѓу Apple и Samsung. Но, овој пат нема да зборуваме за спорови, туку ќе ги споредиме двата главни таблети од овие две компании.

Пред извесно време, Samsung го претстави долго-очекуваниот таблет Galaxy Note 10.1 со Android – одговорот на корејската компанија на светски обожуваниот iPad 3.

Со нивното S-Pen, Samsung смета дека „пенкалото е помоќно од стрелата“, барем онаа замислената на iPad 3.

Дизајн и дисплеј

Искрено, за ниту еден од овие два таблети не може да се каже дека ќе ве кутне во несвест со својот дизајн, особено не кога и двата таблети водат потекло од веќе виден дизајн. Ако толку треба да се гласа за дизајн, можеби тоа би бил iPad 3 поради неговата алуминиумска обвивка, наспроти пластиката кај Galaxy Note 10.1.



Ако ги разгледаме надворешните „испакнатини и владбнатини“ ќе видиме дека и двата таблети делат многу сличности – микрофон, 3,5мм аудио приклучок, контрола на звук и копче за вклучување. Единствено по што Samsung може да има поголема предност тука е инфрацрвениот порт кој го претвора во универзален далечински управувач и специјалните функции кои ги нуди S-Pen.


Од лево кон десно - Samsung Galaxy Note 10.1 и Apple iPad 3  

Визуелно гледано, Retina дисплејот кај iPad е убавина за гледање, особено кога ќе ја споредите неговата резолуција од 2048 x 1536 пиксели наспроти резолуцијата од 1280 x 800 пиксели кај Galaxy Note 10.1. Без сомнежи, 9,7 инчниот IPS LCD дисплеј на iPad 3 овозможува јасна и остра слика, наспроти просечниот 10,1 инчен PLS LCD дисплеј на противникот.

Интерфејс и функционалност

Повторно истата дилема, Android или iOS? Иако претежно се работи за лични преференции, ќе се сложите сепак дека главниот збор го имаат едноставноста и слободата на корисниците да си „играат“ – модифицираат системот – поле во кое iOS заостанува, а Android води. Оосбено ако го додадеме и фактот тука што многу производители си имаат свој интерфејс врз Android.


Интерфејс на Galaxy Note 10.1

Kога зборуваме за функционалност, тука мислиме и на организираност. Апликациите за организирање и кај двата таблети нудат сосема солидна организација и можност за секакви подготовки и планирање, истото може да се каже и за пораките, иако ако сте од англиско говорно подрачје iPad 3 може да добие некој поен плус поради подоброто предвидување на текстот кој го пишувате.


Интерфејс на iPad 3

Но, под функционалност мислиме и на S-Pen за Samsung Galaxy Note 10.1 кој ќе ви се најде од пишување пораки, до цртање, подвлекување и уште илјада други функции поради кои му дава предност на овој таблет.


S Pen

Перформанси

Тука се работи за споредба помеѓу две и четири јадра. На хартија гледано, може ќе речете четири-јадрениот процесор на 1.4GHz и 2GB RAM и тоа како се подобри од дво-јадрениот процесор на 1GHz и 1GB RAM меморија кај iPad 3. Но, никогаш не гледајте чисто теорија, бидејќи во практика таблетот на Apple работи побрзо и беспрекорно во однос на неговиот противник.


Интернет пребарувач кај Galaxy Note 10.1

Интернет и конекција

Кај вакви таблети, нема никаков сомнеж дека интернет сурфање и кај двата таблета е вистинско уживање – од отворање комплексни веб-страници до читање најобичен текст. Сепак, Galaxy Note 10.1 има скриен АС во ракавот – повторно S Pen кој може да служи и како маус.


Интернет пребарувач кај iPad 3

Камера

Не сте единствени ако се прашувате што бараат главни камери (наспроти веб кои се многу потребни) кај таблети, не сте единствените. Во секој случај, и двата таблети имаат камера од по 5 мегапиксели.

Иако разликата во сликите е мала бидејќи и двете камери се со просечен квалитет, iPad 3 како да прави за нијанса подобра слика (видете на сликите подолу).


Квалитет на слика - (горе) Galaxy Note 10.1 - (долу) iPad 3

Мултимедија

Иако во поглед на аудио и видео плеери, тука ќе се осврнеме на хардверскиот дел. Добро поставените и силни звучници кај Galaxy Note 10.1. овозможуваат јасен и доста гласен звук, наспроти слабиот кај iPad 3.

Исто така, благодарение не multitasking опцијата кај Note 10.1, можете истовремено да гледате филм и да правите нешто друго – што не е случај кај iPad 3.

Заклучок

Ако внимателно читавте, досега сигурно си створивте слика дека Samsung Galaxy Note 10.1 e подобар од iPad 3 во многу погледи, како S-Pen, инфрацрвениот порт, можноста за multitasking и сл.

Ако оваа комбинација ја земете предвид, тогаш и навистина изгледа така, но ако ја погледнете поголемата слика, тогаш iPad 3 е победникот.



Не ме сфаќајте погрешно, Samsung Galaxy Note 10.1 е одличен таблет, но ние сметаме дека има подобри таблети со Android, како на пример Google Nexus 7 или Asus Transformer Prime.

Сепак, на крајот сè сведува на личниот избор и веројатно личните преференции ќе бидат пресудни при купувањето на некој од овие два ѕвера.

Кој би го купиле вие? Пишете ни овде.

Владимир Ѓуров