Samsung Ativ Tab – првиот Samsung со Windows 8 RS

Вовед

Ativ Tab е првиот обид на Samsung да направи таблет со Windows, не баш познат терен за Samsung, на кој Корејците настапуваат ни помалку, ни повеќе, туку со новиот Windows 8 RS.

Како и повеќето производители на таблет, веруваме дека и на Samsung кога го правеле Ativ Tab на метата пред нив им било закачена слика од „iPad 3“, па затоа и тие решиле да си ја испробаат среќата. Дали ќе успеат?

Oсновни особини:

• Димензии: 265.8 x 168.1 x 8.9 mm
• Тежина: 570g
• Дисплеј: 10.1 инчен PLS LCD HD дисплеј (1366x768 пиксели)
• OS: Windows 8 RT, Windows интерфејс
• Процесор: Дво-јадрен Krait на 1,5 GHz, Adreno 305 графичка, 2GB RAM меморија
• Поврзување: Dual-band Wi-Fi a/b/g/n, Wi-Fi Direct, Wi-Fi Channel Bonding, Assisted GPS, Bluetooth 4.0, microHDMI, NFC, USB 2.0 Host
• Меморија: 32/64GB вградена, но се проширува преку microSD (до 64GB)
• Камера: 5 MP со автофокус, LED блиц со 720p видео снимање, 1.9MP предна
• Батерија: 8,200mAh Li-Ion
• Останато: Microsoft Office пакет, Gyro sensor, accelerometer за автоматска ротација на екран, ambient light sensor, поддршка за Adobe Flash Player 11, поддршка за DivX/XviD, TV-out, USB host Proprietary 13-pin connector за приклучок на тастатура.

Дизајн и дисплеј

Ativ Tab е убав на лик и квалитетна изработка. Има доста позајмено од Galaxy Note 10.1, но во секој случај изглед подобро, особено со минималистичкиот дизајн.

Таблетот е целосно изработен од пластика, поради што може да помислите дека се работи за лош квалитет, но кога ќе видите дека во рака лежи убаво, ќе го смените мислењето.



Samsung Ativ Tab го краси 10.1 PLS LCD дисплеј со резолуција од 1366 x 768 пиксели. Екранот е доста светол и има одлични агли на гледање. Квалитетот на сликата е натпросечно добар, и иако густина му е само 155ppi, кога ќе се земе предвид дека таблетот го гледаме од поголема оддалеченост во однос на телефоните, ова и не е некој проблем.

Над овој дисплеј се наоѓа предната камера, со сите сензори, додека од по страните се наоѓаат звучниците. Под него ќе го најдете класичното Windows Start копче.



На врвот од уредот (кога го држите хоризонтално) се наоѓаат 3,5 аудио влезот заедно со копчето за вклучување/заклучување и копчињата за звукот. Исто така, тука се наоѓаат и USB 2.0 влезот и microHDMI излезот, покриени со пластични поклопци – заедно со слотот за microSD картичката.

Од задната страна се наоѓа камерата од 5 МП со блиц кога „ја бива“ и за HD видеа.



Windows 8 RT на сцена

Samsung Ativ Tab работи на Microsoft Windows 8 RT – најновата верзија на Windows .



„RT“ делот од името означува специјална верзија на Windows 8 OS, дизајнирана да работи на ARM процесори. Како резултат на тоа, Windows 8 RT може да рабооти само на  апликации со Metro интерфејс, а не типични x86 Windows апликации.

Заклучениот екран на Windows 8 RT е функционален, ги покажува датумот и времето, како и иконите за батеријата и Wi-Fi статусот. Кога ќе го отклучите доаѓа до израз Windows 7 стилот, но со „живи“ икони кои се однесуваат како кратенки до разни апликации и сервиси, сè тоа проследено со анимации.



Windows 8 воведе и неколку операции со движења за подобро корисничко работење. Со движење на прстите кон десно се појавува нешто што Microsoft го нарекува „Charms“ – таскбар со неколку икони како Пребарувај, Сподели, Почеток, Уреди и Опции.



Десктоп апликации

Windows 8 RT доаѓа во Десктоп режим. Тука мислиме на апликации како пребарувач на фајлови, Control panel, Device manager и Task manager. За жал, класичните x86 апликации не се инсталираат на Windows 8 RT.

Во Десктоп режим, работите изгледаат скоро исто како кај Windows 7 на PC, со исклучок на Start копчето во левиот долен агол.



Иконата за task manager е редизајнирана и сега покажува две групи на процеси – активни и оние во позадина. Потоа, тука ви ја покажува искористеноста на RAM меморија и колку енергија троши процесорот и секоја апликација, како и други корисни апликации.



Пребарувачот на фајлови работи одлично и нема проблеми со какви било други уреди кои би му ги приклучиле.

Internet Explorer 10

Microsoft воведе Internet Explorer 10 за Windows 8, а тука тој доаѓа во две „нијанси“ – класичен и во Metro стил – последниов Metro стил е достапен само ако го активирате од Старт менито на уредот и поддржува движења со прстите.



До класичниот Internet Explorer 10 се доаѓа од самиот десктоп. Тој го носи истиот дизајн како во останатите верзии и поддржува сè: од табови до одбележувачи. Сега ново и менито со опции кое ви овозможува подлабоко да „чепнете“ низ системот, па да ракувате со колачиња, да овозможувате и блокирате страници, да управувате со „кешот“ и други опции.

Office 2013

Уште еден трик кој го носи Windows 8 RT е  Office 2013 Home & Student издание. Тука се вклучени Microsoft Word, Excel, PowerPoint и OneNote.



За да го забрза и поедностави работењето на Windows RT, Microsoft отстранил некои особини во Office 2013 RT. На пример, не може да додавате third-party додатоци или да користите макроа. Исто така, нема ниту поддршка за Visual Basic апликации.

Office 2013 RT имате опција да го оптимизирате корисничкиот интерфејс за допир, дури за тоа има посебно копче. Откако ќе го притиснете, копчињата го менуваат ликот, што ви кажува дека се подготвени за допир.

Заклучок

Сè на сè, Windows 8 таблетите изгледаат како доста привлечна опција – се разбира, покрај iPad и Android таблетите.

Интерфејсот е зачудувачки добар со многу кул анимации и движења, па и по некој трик. Покрај тоа што е убав, тој е и пријателски настроен. Ativ Tab нема некој силен хардвер, ама тоа и не е до толку важно бидејќи очигледно Windows 8 RS користи помалку ресурси, а добро ги искористува постоечките.



Значи, Ativ Tab може не е во истата лига како iPad 3 или Galaxy Note 10.1, но тоа ќе го покаже и по далеку пониската цена. Но, и покрај неа, во овој случај не би се согласиле со народната; „Колку пари-толку музика“, бидејќи Samsung Ativ Tab нуди одличен дисплеј и интерфејс.

Засега не се знае неговата цена, но ако се покаже евтин таблет, како што се очекува, навистина има причина да размислите што сакате со вашите пари.

Владимир Ѓуров