Samsung Galaxy Ace 3 - Ас во ракавот

Samsung е апсолутен владетел во светот на мобилната технологија во последните две години, но работите и не се баш идеални за компанијата која поради преголемите очекувања, популарност и помпа загуби многу од својата пазарна вредност, неверојатни 12 милијарди долари. Затоа Samsung  треба да се фокусира и на понудата во ниската и средната класа каде може да се продаваат огромни количини на телефони, без страв дека ќе има потфрлање со само еден премиум смартфон, како што е Samsung Galaxy S4. Во тој правец е пласманот и на добро познатиот Samsung Galaxy Ace 3 кој треба да ја продолжи традицијата на своите два претходника и да им понуди на корисниците квалитет за малку пари, па да видиме во оваа детална анализа дали Samsung успеал да го направи тоа по трет пат.

Дизајн и Екран

Овој смартфон се разликува од така наречениот дијамантски дизајн кој го поседуваат повеќе нови смартфони на Samsung и има многу поедноставни линии и застарен изглед. Над и под екранот има многу простор, а доле се сметени и три физички копчиња наначени како home, menu и back, како и кај постарите смартфони на Samsung.

 

Samsung Galaxy Ace 3 е прилично крупен смартфон со дебелина од 10 милиметри и тежина од 120 грама, но затоа пак граничната линија околу екранот е многу намалена. На левата страна се наоѓа леверот за звук, додека пак од десната копчето за вклучување/заклучување. Се на се може да се каже дека Samsung Galaxy Ace 3 нема премногу да ве воодушеви со својот изглед и речиси и да нема никакви промени во дизајнот.

 

Samsung Galaxy Ace 3 има 4 инчен екран со пониско ниво на резолуција од 480x800 и пристојна густина на пикселација од 233ppi што е доволно за добра видливост. Екранот не е доволно осветлен што значи дека ќе имате мали проблеми со видливоста на отворено.

Софтвер

Голема предност на овој смартфон е што работи на најновиот кориснички интерфејс на Samsung TouchWiz Nature UX кој е употребен и кај врвните смартфони од серијата Galaxy, што значи дека го добивате најновиот изглед на менито, иконите и позадините. Корисничкиот интерфејс во голема мера го менува почетниот изглед на оперативниот систем Android 4.2 Jelly Bean, а освен промени во изгледот Samsung додал и уште неколку сопствени функционални алатки.

 

Хардвер
 

Samsung Galaxy Ace 3 е опремен со многу скромни хардверски компоненти, како што е двојадрениот процесор со брзина од само 1 GHz, заедно со 1 RAM  и PowerVR SGX544MP графичка. Сето тоа изгледа премалку, но во суштина смартфонот успева да ги заврши сите операции навремено без поголеми кочења и пречки во функционалноста. За меморијата се обезбедени 8 GB кои може да се надополнат преку microSD картичка. Интернет прелистувачот на Samsung функционира одлично и обезбедува доволна брзина, а истиот има и подршка за Adobe Flash содржини за разлика од Google Chrome. За поврзување се достапни 4G LTE, 3G, HSPA мрежи што значи покриеност за речиси сите држави и оператори, како и стандардните поврзувања преку Wi-Fi, Bluetooth 4.0, A-GPS, FM радио со RDS и NFC.

 

Камера
 

Смартфонот има просечна 5 MP камера со LED блиц која е надополнета со Nature UX интерфејсот. Во него се содржани неколку основни опции како Best Shot, Sound&Shot и Panorama, додека пак понапредните опции недостасуваат. Самата камера има можност автоматски да ја прилагодува сцената и резултатите се прилично добри, што значи дека не треба постојано да го променувате блицот или балансот на бело. Со неа може да снимате и видеа со резолуција од 720p и 30fps со добар аудио квалитет.

Заклучок
 

Samsung Galaxy Ace 3 е просечен смартфон и е тешко да се споредува со сите моќни уреди кои постојано излегуваат на пазарот, но затоа пак ги поседува основните компоненти за навремено завршување на зададените задачи, секако со предупредување дека ќе има повремени кочења и брзината не е иста како и кај некој четири јадрен смартфон.



Во речиси сите категори Samsung Galaxy Ace 3 има мали недостатоци, како ниската резолуција на 4 инчниот екран, слабиот процесор со брзина од само 1 GHz, послабата камера од 5 мегапиксели и недостигот на поголем број на опции вп софтверот како и поновите Samsung Galaxy S уреди. Сепак во целина Samsung Galaxy Ace 3 би требало да ви служи за основните потреби, како што е користење на интерет, повремено играње на игри за мобилен, праќање мејл и инсталирање на повеќе корисни апликации.

Автор 

Христијан Станоевиќ