Sony Xperia Ear Duo: паметни слушалки кои ви дозволуваат да ја слушнете и околината 

Објавено на 12.04.2018 во Рецензија


Sony Xperia Ear Duo: паметни слушалки кои ви дозволуваат да ја слушнете и околината 

Оцени

usability
8.0


Перформанси
7.5


Цена
5.0


Камера
10.0


резултат
7.6


Наши забелешки

Positives:

Перфектно добро се слушаат звуци од околината 

Одлични контроли со гестикулација на главата 

Вграден дигитален асистент кој ќе ви помогне полесно да го поминете денот 

Одличен комфор дури и при долго носење 

Брзо полнење 

 

Negatives:

Висока цена 

Не можат да заменат класични слушалки за квалитетно аудио искуство 



Целата рецензија

Скоро секој од нас денес има некаков пар на слушалки, било дали се работи за оние кои доаѓаат со самиот телефон или пак поскап пар за подобро аудио искуство. Во последно време безжичните Bluetooth слушалки се новиот стандард на пазарот и после користење на такви, тешко е да се вратите назад – кабелот е навистина големо ограничување. 

Ваквите слушалки исто така станаа и многу попаметни и имаат најразлични функции кои овозможуваат интеракција со нив само со говор, како на пример поставување на прашања кон Google Assistant или пак со допир на самата слушалка. Sony Xperia Ear Duo се целосно безжични слушалки, кои донесуваат целосно нов систем на можности и кои според нас се едни од најдобрите слушалки од овој тип што може да ги купите. 

Кои карактеристики ги имаат Sony Xperia Ear Duo и зошто да ги купам? 

Xperia Ear Duo се слушалки кои се наменети пред се за луѓе кои треба да ја слушнат и околината. На пример, на нив може да слушате музика на работното место и да ги слушате и соработниците, односно да возите мотоцикл или велосипед и да ги слушате звуците од сообраќајот. Всушност, овие слушалки го засилуваат звукот од околината со цел полесно да го чуете.  

Воедно, Xperia Ear Duo имаат и паметен начин на интеракција. За да кренете повик кога ќе заѕвони некој на вашиот смартфон, можете да одговорите со климање на главата и потоа да спуштите со негирање на главата. На моето тестирање, ова се покажа како многу корисно и во ниту еден момент немавме проблем со тоа да не го регистрира нашето движење на главата. Истите команди можете да ги користите и за премотување на музика, а за контрола на гласноста треба да го користите вашиот прст (лизгање на слушалката горе-долу), што исто така работи перфектно. 

Делуваат многу чудно – како се ставаат на увото? 

Признавам, Xperia Ear Duo изгледаат чудно, особено што делот кој се става во увото е поврзан со цевче со поголемиот дел во кој се сместени сензорите, чипот и батеријата. Исто така, тие се поставуваат со цевчето под увото, за разлика од скоро сите други слушалки со сличен дизајн, кои се поставуваат над увото за да не паднат. 

Во реалноста, тие се прилично удобни и добро се држат на увото, дури и при движење на главата лево-десно и горе-доле. Не би требало ниту да имате проблем при трчање – Xperia Ear Duo ќе останат добро прилепени за вашето уво, а нема да имаат проблем ниту мотоциклистите кои носат кацига. Единствено, нивното ставање во увото е малку потешко и побавно отколку со други слушалки, но сигурен сум дека брзо ќе се навикнете.  

Каков звук имаат? Можат да заменат добри Hi-Fi слушалки? 

Ако планирате да купите слушалки кои ќе произведуваат високо квалитетен и чист звук, ова не се слушалките за вас. Напротив, тие се направени да слушате музика, додека ја слушате и околината. Поради тоа, песните кои ќе ги слушате секогаш ќе бидат придружени од звуци од околината, што секако не е идеално за слушање музика. 

Самиот звук е прилично чист, има добра дистинкција меѓу ниските, средните и високите тонови и малку послаб бас, но сигурен сум дека многу други слушалки на Sony во овој ценовен ранг ќе понудат подобро аудио искуство. Всушност, Hi-Fi звукот не ни бил намерата на Sony со овој модел. 

Што е паметно кај овие слушалки? 

Xperia Ear Duo функционираат со специјална апликација на Sony, достапна за Android и iOS, која има вграден Xperia дигитален асистент. Овој асистент може да ви ги чита дневните задачи од роковникот и да ви го каже времето пред да излезете од дома, а исто така да ве потсетува за истите во текот на денот. Ear Duo работат и со Google Assistant и Siri, што значи дека може да го користите и асистентот кој досега сте го користеле. 

Токму тоа е и идејата со Xperia Ear Duo – цело време да бидат прикачени на вашето уво, независно од тоа дали слушате музика или не. Ова го замислувам како многу корисно за бизнис корисниците, на кои особено многу им е важно времето. Вакви слушалки значително можат да го олеснат организирањето на дневните обврски, со единствен минус што би изгледале чудно додека ги користите. Но, за некои корисници придобивките можат да бидат доволно големи за да се оправда тоа. 

Колку им трае батеријата? 

Батеријата има пократко траење од директните конкуренти, како на пример Apple AirPods. Поточно, тие можат да издржат околу 4 часа со едно полнење, но футролата во која се носат може да ги наполни четири пати. Во превод, со наполнета футрола може да слушате 16 часа музика непрекинато. Футролата поддржува и брзо полнење – 7 минути полнење на електричната мрежа, овозможува 1 час слушање музика. Со оглед на природата на овие слушалки и тоа дека нема апсолутно секогаш да се користат за слушање музика, ние сметаме дека ова е сосема доволно. 

Колку е висока цената и дали треба да ги купам? 

Кај нас Xperia Ear Duo чинат околу 280 евра, што е многу за еден пар слушалки. Ако сте во план да потрошите толку многу пари на слушалки и сакате некои што ќе понудат подобро аудио искуство, Sony има и поевтини Bluetooth модели кои ќе звучат подобро. 

Но, уникатниот сет на карактеристики на Ear Duo би можеле да бидат особено корисни за корисниците кои редовно возат мотоцикл и велосипед – со нив ќе може перфектно добро да ја слушате околината и да слушате музика во исто време. Според мене, безбедноста нема цена, а со овие слушалки секако дека ќе бидете многу побезбедни. 

Воедно, паметните карактеристики, како и сензорите кои препознаваат движење на главата се висока технологија, која не можете да ја добиете кај конкуренцијата. Ако тие можности ви фаќаат око, Xperia Ear Duo се слушалки кои сигурно нема да ве разочараат. Напротив, би можеле и да го променат начинот на кој функционирате на подобро. 

Дали ви се допадна рецензијата? Ако имате нешто да дополните ве молиме напишете коментар


За авторот

Телефони.мк
Author Image
Телефони.мк е веб портал кој што постои од 2007.



 
Најнови телефони
 
  • Watch Edition Series 3
  • Watch Series 3
  • Watch Series 3 Aluminum
  • Watch Edition Series 2 42mm
  • Watch Series 2 42mm
  • Watch Edition Series 2 38mm
  • Watch Series 2 38mm
  • Watch Series 2 Aluminum 42mm
  • Watch Series 1 Aluminum 42mm
  • Watch Series 2 Aluminum 38mm