Apple на прес конференција ги претстави финансиските резултати остварени во првото тромесечје оваа година. За прв пат после 10 години компанијата објави дека има пад во профитот.

Добрата вест е што компанијата е се уште силна и по година ипол од заминувањето на Steve Jobs. Apple остварила приход од 43.6 милијарди долари, што е подобро од предвидувањата кои беа околу 41-43 милијарди долари за овој квартал. Во споредба со истиот период лани, компанијата има остварено мал раст во продажбата на своите производи во САД и Кина.

За жал, сепак глобалниот профит е намален на 9.5 милијарди долари, за разлика од истиот период минатата година кога изнесуваше 11.6 милијарди долари.

Apple продал 37.4 милиони iPhone смартфони, што е повеќе за разлика од 2012 година (35.1 милион), како и одлична бројка за продадени iPad таблети од 19.5 милиони (11.8 милиони за истиот квартал минатата година).

Извршниот директор, Tim Cook, изјави дека и покрај падот на вредноста на акцијата на компанијата, Apple продолжува да го прави она што знае најдобро, а тоа е создавање на иновативни производи.