Шефот на криптоберзата FTX смета дека bitcoin нема иднина како платна мрежа
За некои криптовалутите се уште се голема измама, додека за други тоа е иднината, сметајќи дека децентрализираните финансии со блокчејн технологија ќе го преземат приматот над класичните финансиски институции. За позитивните страни на крипто како што е bitcoin, најчесто читаме кога цената расте, а кога имаме пад на вредноста, секогаш има негативни вести.
Сем Бенкман-Фрајд е еден од основачите и извршен директор на крипто берзата FTX. Според последното вложување во FTX во февруари, вредноста на таа берза изнесува 32 милијарди долари, додека Бенкман-Фрајд има богатство вредно над 20 милијарди долари. Тој смета дека bitcoin нема иднина како платна мрежа, поради неефикасноста и големите трошоци за околината.
Како алтернатива ја издвоил “proof of stake” (POS) мрежата, која е енергетски поефикасна и побрзо обработува трансакции во споредба со “proof of work” (POW) мрежите. Ако ги споредиме bitcoin и ether, треба да се нагласи дека ether е во постапка на транзиција кон POS мрежата. Bitcoin може да го гледаме како имот и средство за вложување на долг рок, кој има одредена вредност за сите оние што го поседуваат, како златото.