Официјално Samsung Gear S и LG G Watch R - Смарт часовници за мерак
Објавено на 28.08.2014 во Смарт часовници
Корејските гиганти и огромни конкуренти LG и Samsung директно се судрија и во ист ден ги промовираа новите смарт часовници Samsung Gear S и LG G Watch R кои изгледаат навистина прекрасно и повеќе потсетуваат на луксузни рачни часовници отколку на парче модерна технологија.
Samsung Gear S доаѓа со закривен екран со големина од 2 инчи и ја користи Super AMOLED технологијата што значи дека корисниците ќе имаат врвна слика со силно изразени бои, додека пак LG G Watch R го нуди првиот целосно кружен екран со големина од 1.3 инчи и Plastic OLED технологија при резолуција од 320 х 320 пиксели.
Во оваа категорија Samsung Gear S има мала предност поради повисокиот степен на осветленост и приказ на бои, но LG G Watch R е многу поелегантен, изгледа полуксузно и секој би посакал да го носи на својата рака.
Samsung Gear S работи на оперативниот систем Tizen, што значи дека ќе има помал избор на апликации, но затоа пак може да се поврзе со било кој смартфон преку Bluetooth конекција, а има и независна Wi-Fi и 3G конекција за користење на интернет сервиси и примање на телефонски повици.
Од друга страна пак LG G Watch R работи на Android Wear платформата на Google која се очекува да добие огромен број на апликации благодарение на масовната Android заедница на девелопери и во оваа категорија ја добива битката, се додека Samsung не докаже дека во Tizen ќе се вложат повеќе напори и поголема подршка од девелоперите.
Во однос на дизајнот и функционалноста LG G Watch R освојува нови поени бидејќи е заштитен од вода и прашина со IP67 сертификатот, има ременче од нер`ѓосувачки челик и резерва со кожно ременче што изгледа одлично вклопено во целиот изглед, додека пак Samsung Gear S поради малата заобленост и флексибилност ќе биде многу удобен за носење на раката. Samsung Gear S исто така го исполнува IP67 сертификатот.
Хардверските компоненти се многу слични и двата часовника работат на Qualcomm Snapdragon процесор од 1.2 GHz, со 512 MB RAM, 4 GB вградена меморија, но LG G Watch R има поиздржлива батерија од 410 mAh, додека Samsung Gear S е ограничен на дводневна работа со батерија од 300 mAh.
Останува уште само да биде откриени цената и датумот на пуштање на продажба на Samsung Gear S и LG G Watch R, па овие детали ќе бидат познати во текот на наредната недела кога ќе започне саемот IFA 2014 во Берлин.
Автор
Христијан Станоевиќ
Текстот не смее да се печати или емитува, во целина или во делови без договор со Telefoni.mk.