Nokia Lumia 720 Windows Phone 8

Nokia Lumia 720 e најнов мобилен телефон на финската компанија кој беше претставен во февруари на Светскиот мобилен конгрес во Барселона. Со овој смартфон Nokia ја заокружува својата понуда во сите класи, а Nokia Lumia 720 припаѓа на средната класа со нешто пониска цена. За да ги привлече корисниците со Lumia 720 Nokia понуди квалитетен смартфон во рамките на Windows Phone 8 платформата, па да видиме со што може да се пофали во анализата која следи.



Дизајн

Nokia Lumia 720 има навистина привлечен дизајн, пристојни димензии со дебелина на телото од 9 mm и тежина од 128 g, со што го добиваме еден од најкомпактните смартфони во Windows Phone сегментот. Nokia Lumia 720 го поседува истото ниво на квалитет како и Nokia Lumia 920, ја има истата цврста градба од поликарбонат но, сместена во многу помали димензии.

   

Во поглед на функционалноста на дизајнот може да се истакне дека влезот за SMS картичката се наоѓа на врвот до влезот за слушалките што е малку необично. Страничните физички копчиња се изработени од квалитетниот материјал циркон. Од десната страна се наоѓа леверот за регулација на звук и посебно копче за камерата. Под екранот нема дополнителни физички копчиња а, тие се вградени во функциите на интерфејсот.

   

Екран

Овој смартфон има 4.3 инчен ClearBlack LCD екран со ниска резолуција од 480 x 800 пиксели. Nokia и понатаму заостанува во развојот на дисплеите и е далеку зад конкурентите од Android кои го донесоа и Full HD стандардот. Тоа за Nokia Lumia 720 не менува премногу бидејќи квалитетот на екранот е задоволувачки. Предности на екранот се големата видливост на отворено под директна сончева светлина како и големата сензитивност па, овој смартфон може да го управувате и со ракавици.



Софтвер и Хардвер

Windows Phone 8 сеуште не може да се пофали дека ги стигнал многу покорисните оперативни системи iOS и Android, ниту пак бројот на апликации во Play Store и App Store. Сепак во последниот месец има голем напредок во обезбедување на популарни апликации како Viber, Twitter и уште многу други. Инаку Nokia стандардно обезбедува голем број на одлични апликации за сите области. Оперативниот систем Windows Phone 8 е надополнет со стандардниот интерфејс кој има неколку квалитетни додатоци, како што е Live Tiles и приказот на сите промени и известувања.



Nokia Lumia 720 припаѓа на средната класа, барем според стандардите на Microsofoft и затоа не може да се пофали со моќен хардвер. Него го сочинуваат сво-јадрен процесор Snapdragon S4 Plus со брзина од 1 GHz, графичка Adreno 305, 512 MB RAM, 8 GB меморија како и слот за мемориска картичка microSD. Со овие компоненти и оптимизацијата на софтверот Nokia Lumia 720 успева да обезбеди ефикасна работа без никакви проблеми.



Камера и Мултимедиа

Nokia Lumia 720 ја има најчудната камера барем кога се во прашање мегапикселите кои овде се 6.7 на број. Финците секогаш успеваат да докажат дека нивната моќ лежи токму во камерата, па така е и во случај на овој телефон. Камерата има LED блиц како и голем број на опции за прилагодување во интерфејсот. Сликите се квалитетни со добра изразеност на боите и контрастот, а истата снима HD видеа со резолуција до 720 пиксели. Во делот на забавата може да го користите мултимедијалниот плеер на Nokia кој има голем број на стандардни опции за слушање на музика и гледање на видеа.



Заклучок

Nokia Lumia 720 е солиден смартфон за својата класа и дефинитивно е добар избор доколку сакате фински производ или пак да видите како функционира оперативниот систем Windows Phone 8. Овој смартфон припаѓа во средната класа и може да се каже дека е многу подобар од ланскиот втор фаворит Nokia Lumia 820 иако има за нијанса послаб хардвер, но тоа не се осетува во целокупниот перформанс. Исто така предност е и неговата пониска цена, како и задржаниот квалитет на градба. Како најголем конкурент може да се издвои HTC 8S од Windows Phone 8 семејството, а од Android има еден куп на квалитетни смартфони од средната класа кои исто така се во рамките на цената од 200 долари.



Автор

Христијан Станоевиќ