Дигиталните уметнички дела, виртуелната куќа, првиот твит, дел од кодот на world wide web, се само некои од нештата што не можат да се допрат, а се продадени за енормно високи суми како NFT, односно незаменливи дигитални токени. 

Една полска инфлуенсерка е сега чекор понапред. Марта Рентел на интернет ја понудила својата љубов како NFT, и тоа за дури 250 илјади долари. И успешно ја продала. Анонимниот купувач така ќе има прилика да отиде на вечера со полската инфлуенсерка, само што не е познато конкретно каде, и кој е среќникот што платил толкава количина на пари.

Ова е прв пат некој да понуди човечка емоција на продажба, а покренато е прашањето како некој може да биде сигурен дека го добил тоа што го купил. Ќе добие ли некаков сертификат дека е сопственик на љубовта на Рентел, се уште останува непознато.

Како што објаснува Рентел, одлучила да ја понуди својата љубов на продажба, затоа што сака да направи разлика меѓу лицата Марта Рентел и својата Instagram персона @martirenti. Ренти има над 650 илјада следбеници на Instagram и 2,4 милиони на TikTok. Додава дека нејзината дигитална верзија може да продава љубов, затоа што ништо во онлајн светот не е физичко.

Оваа прва NFT љубов се базира на дигиталната ДНК на @MartiRenti. Симболот и стартот на новата дигитална ера ја напишала на својата интернет страница. Ќе биде интересно да се види што следно ќе се најде на продажба за NFT. Можеби некој ќе понуди омраза или депресија. Ако гледаме според она што досега се продаваше, може да биде било што.