Alcatel One Touch Idol - Новиот мобилен идол

Alcatel e мобилен бренд кој долго време е присутен на македонскиот пазар и многумина поседувале некој модел од оваа компанија. Подолго време на Alcatel се гледаше како на бренд од ниската класа кој нуди евтини телефони, но со добар квалитет. Во последно време Alcatel понуди навистина добри смартфони од новата генерација кои ги поседуваат најдобрите компоненти, но компанијата не заборава повремено да лансира смартфон кој може да си го дозволи секој. Токму таков е и Alcatel One Touch Idol кој треба првенствено да ве привлече со својата цена а во продолжение ќе направиме анализа дали навистина вреди да се поседува овој смартфон.

 
 
Дизајн
 
Alcatel ретко успева да довие врвни оценки кога е во прашање дизајнот на кој му недостасува автентичност и поголема креативност. Alcatel One Touch Idol можеби не е најубавиот или најоригиналниот смартфон со својот изглед, но затоа пак надоместува со својата функционалност, квалитетна изработа и минимални димензии што допринесуваат за неговата практична употреба. Заедно во пакет со Alcatel OT Idol се вклучени и стерео слушалки.

    
 
Смартфонот е навистина добро скоцкан, има дебелина од само 7.9 милиметри што го прави еден од најтенките и е многу лесен со тежина од 110 грама. Тоа е одлично достигнување бидејќи се работи за телефон со голем екран од 4.7 инчи. Единствено на задната страна се издвојува главната камера која има голем издаток што го прави многу нерамен, но тоа и не е така голема пречка. Задната страна е обложена со тенок метал што допринесува за неговата црвстина и удобно држење во раката. Остатокот од рамката е пак изработен од пластика. Alcatel приредил вистинска игра со бои и може да одберете црна, сребрена, зелена, сина, црвена и розева маска.

    

Екран
 
Ретко може да сретнете квалитетен смартфон со големина на екранот од над 4 инчи, а кај Alcatel OT Idol дијагоналата на екранот изнесува 4.7 инчи. Користена е IPS LCD технологијата, но нивото на резолуција и не е така високо со 540 х 960 пиксели што резултира со пикселација од 236p на еден инч. Тоа е доволно за смартфон од средната класа и со него нема да имате никакви проблеми со острина на сликата при зумирање на текст, гледање на видеа или пак играње на игри. Екранот е заштитен и со DragonTrail стаклото кое е помалку познато од Cornig Gorilla Glass, но си ја завршува својата задача. Понатаму Alcatel има употребено и посебна материја која го заштитува екранот од оставање на отпечатоци од прсти што значи дека нема постојано да се грижите за чистење.


 
Софтвер
 
Alcatel OT Idol работи на оперативниот систем Android 4.1.1 Jelly Bean кој и не е најнов, но тоа не менува многу. Во однос на интерфејсот Alcatel вовел неколку сопствени промени во заклучениот екран, иконите и лентата со нотификации. Промените се повеќе визуелни и козметички, отколку функционални, што значи дека добивате смартфон со речиси идентично искуство како и кај базичниот Nexus уред. Тоа има одредена предност бидејќи не го оптоварува системот и е многу едноставен за користење.

   
 
На заклучениот екран како додаток има кратенки за брза активација кон камерата, СМС пораки и до одредени апликации кои за жал не може да ги промените по ваш избор. Во делот на лентата со известувања има неколку додатоци за брз пристап до речиси сите опции на телефонот, а како најинтересна е опцијата која ви покажува колку сте оствариле интернет сообраќај.

  
 
Хардвер
 
„Идолот“ работи на скромниот дво-јадрен процесор со брзина од само 1 GHz кој е изработен од компанијата MediaTek. За оваа серија на процесори важи правилото дека имаат многу послаби перформанси отколку процесорите на Qualcomm Snapdragon, а тоа се забележува и со овој смартфон. Сите задачи и функции ги завршува навремено, но се забележуваат мали кочења при менување на апликациите и управување со опциите. За подобар мултитаскинг е обезбеден 1 RAM, како и 16 GB вградена меморија која може да се надополни преку microSD мемориска картичка. Интересно е да се спомене дека кај верзијата Alcatel One Touch Idol која работи на две SIM картички нема слот за мемориска. 



Камера и Мултимедиа
 
Alcatel One Touch Idol има 8 мегапикселна камера со LED блиц. Сликите кои се добиваат може да се оценат како просечни и речиси и да не одговараат на квалитетот кој се очекува од ваква камера. Најдобри резултати се добиваат на отворено со присуство на голема осветленост но, на истите им недостигаат повеќе детали. Речиси идентична ситуација има и со сликите направени ноќе или пак на затворено. Со оваа камера ќе може да снимате видеа со HD резолуција но, не очекувајте премногу стабилна слика. Во делот на забавата Alcatel поставил сопствен плеер кој ги чита речиси сите познати аудио и видео формати, но единствена слаба страна е што смартфонот не подржува HD видеа со резолуција од 1080p. Доколку не сте задоволни од овој плeер може да го користите Google Play или било која друга мултимедијална апликaција од Play Store.



Заклучок
 
Доколку главен приоритет ви е да поседувате смартфон со голем екран Alcatel One Touch Idol е одличен избор бидејќи за таа цена ретко ќе најдете сличен уред. Речиси сите добри смартфони од средната и ниската класа имаа екрани кои се помали и се со големина од околу 4.5 инчи. Во прилог на Alcatel One Touch Idol оди и тоа што има повеќе добри страни, како што е компактниот дизајн, малите димензии и квалитетот на градба. Од друга страна пак неговиот хардвер нема врвни перформанси, а исто така и камерата е со послаб квалитет од назначениот. Кога би го споредиле Alcatel One Touch Idol со телефони од сличната класа и приближно иста цена ќе дојдеме до заклучок дека негова најголема предност е големиот екран, додека за останатите карактеристики може да се најдат подобри смартфони меѓу кои е и LG Optimus L7 II. 


 
Автор
 
Христијан Станоевиќ